@InkuizitoriMoth shkruajti:
Nusepashke fluturo,
se të erdhi burri,
burri nga fshati,
nusja nga Berati.
(refren i hershëm femijnie)------------------------------------
-Sa nervoz që je sot!
-Nga e kupton ti që jam nervoz sot!? – thashë turivarë.
-Qoftë nga kjo lloj përgjigje.
-E nga çfar tjetër?
-S’ka nevojë për tjetër.
-Nuk është ndryshe përgjigja jote.
-S’ka si të jetë ndryshe “përgjigja jote” e infektuar nga përgjigja jote.
-E si të mos jesh nervoz, makina e re, gjith ato pare dhe nuk i gjendet karari kondicionerit, o të avullohet xhami, o të hyn brënda në kabinë tymi i skapamentos së makinës që ke para. Makina e vjetër nuk bënte kësi numra, e kish zgjidh ndryshe problemin. Tani thith tym, thith se të bën mirë, gjaku mbushur tumllas me hidrokarbure. 18.000 mije euro helm!
-Ndoshta s’di ti me i lujt tamom mrrokllat e ventilatorit dhe kondicionerit. Edhe tani nuk po di se çfar je tu bo duke shtyp rraka zhdraka butonat. Ka një logjikë kur spostohen pozicionet e mrokllave që lidhen me njëra tjetrën. Nuk bëhen punët me tentativa kot me kot si bën ti, xhiro me histeri tafti bafti mrokllën nga poshtë lart në tavan me shpresë se del gjë rastësisht.
-Si rastësisht, pse rastësisht? Pse në taracë?
-Kush tha në taracë? Thash në tavan, në taracë po thu ti!
-E çu pa taracë apo tavan? E njëjta gjë është, soleta e betonit parë nga poshtë quhet tavan, e parë nga sipër quhet taracë.
-Hë jepi tani profesor, çliroju me metafizikën e betonit sipas Niçes, nuk ekziston betoni, por ekziston interpretimi i betonit sipër taracës dhe poshtë tavanit!
-Ahahaha, tani vërtet u çlirova. Kaq ishte, tani pothuajse me kaloi. Më fal, ndjesë se ashtu osht i punë! Pastaj ti e di, të kam thënë që po kaloj fazën më të vështirë të jetës sime. Pa krahasim me të tjera halle më parë, kurrë i parë një sulm i tillë, janë tamam një bandë kriminelash xhentile të veshur me sqimë firmato - buzëqesha më në fund i cfilitur.
-E di, e di, por di edhe që Niçja ka thënë se është ndryshe të dish për tjetrin nga poshtë tavanit, dhe ndryshe ta provosh vetë sipër taracës - nxorri llapën si çapkëne.
-Shiko të them pse më kaloi. Sei veramente brava, me taracën që u bëre shkak të futet në muhabet fare rastësisht - në fakt do të shoç se rastësisht i thënçin - më kujtove ëndrrën që pashë dje natën. Eshtë një ëndërr standard që e shoh herë pas here kur jam në hall të madh dhe më duhet detyrimisht të bëj zgjedhje radikale për jetë a vdekje. Eshtë shumë domethënëse si ëndërr, në rini e shihja shumë më shpesh, më pas disi më rallë. Sikur ndodhesha në taracë të pallatit katërkatsh të kohës së komunizmit. Atëbotë taracat ndërtoheshin pa bordurë mbrojtëse, pra tmerri i rënies në humnerë ishte gjithnjë i pranishëm që kur ngrije qepenin e vrimës katërkëndëshe mbi tavanin e hyrjes të katit të katërt të pallatit dhe nxirrje kokën duke bërë një ushtrim të vështirë gjimnastikor - që kërkonte muskuj barku dhe abdominale të zhvilluar mirë - rrakapjekthi mbi një shkallë druri të lëvizëshmë. Jo çdokush mund të ngjitej në taracë, dhe ngjitja bëhej për arsye pune, jo qefi (rasti më i rëndomtë: rregullimi i antenës televizorit). Por me tu ngjitur, gjithçka dukej krejt ndryshe mbi taracë, ngaqë ndryshonte perspektiva e pamjes dhe shqisat përforcoheshin nga ankthi i rënies dhe gjimnastika rraskapitëse e ngjitjes në shkallë druri që lëkundeshin rrezikshëm. Mali i Dajtit ngrihej shumë më i madh si siluetë, dukej sikur të ishte Xhomolunga; Tirana ngjante si rrafsh i pafund betoni ku mbinin antena televizive si bimë futuriste me ndriçim mat zinku dhe alumini; qielli dukej më i afërt, më i pranishëm dhe më konkret - megjithse më i lartë -, dhe i kaltërt ndryshe, si qiell deti. Deri edhe zhurmat ndjeheshin ndryshe: rrokopuja e kalamajve të lagjes në lojë e sipër (gjë që tani të merr malli të dëgjosh), bërtima ankimtare e ndonjë mamaje nga ballkoni varur kokëposhtë, rrapëllima e gomave të autobuzëve etj, të gjitha zhurma më të gjalla, më uturitëse dhe më të drejtpërdrejta, pa jehonë; era pickuese e blozës së oxhakëve. Pra gjithçka përreth e njejtë, megjithse pa ndryshim (e ç’janë katër kate lartësi?) dukej si sureale, si një ëndërr. E parë e gjithë kjo në ëndërr siç e pashë, i bie të jetë dyfish ëndërr, si një ëndërr parë në ëndërr, e megjithkëtë shumë reale, shumë më reale se realiteti, një realitet që shkakton dhimbje gërryese si esencë koncentrat i reales. Kjo është kuintesenca e Tiranës, është Tirana shpirtërore, Tirana e botës tjetër. Tirana, di notte penso a te.
Si në versionet e hershme të kësaj ëndrre, edhe kësaj here për absurd nuk kishte mundësi kthimi mbrapsht për të zbritur nga isha ngjitur. Nuk ekzistonte mundësi tjetër, më duhej detyrimisht të hidhesha poshtë në honin e frikshëm dhe njëkohësisht tmerrsisht joshës që të shtyn këmbët fatalisht me dëshirë-frikë perverse drejt cepit pa bordurë të taracës që njëkohësisht tërheq dhe largon, si rëndom humnera. Nuk më mbetej rrugë tjetër. Por kësaj radhe, ndryshe nga herët e tjera, ndjenja fatale e pamundësisë së kthimit nuk ishte vetëm personale. Pranë kisha një figure feminile me pamje krejt të rëndomtë, jo vetëm pa sharm, por pothuajse pa seksualitet (jo në kuptimin që ishte si burrë, nuk joshte si femer, por jo se i mungonte gracia), e cila më thoshte në mënyrë neutrale duke treguar humnerën me qetësi: “Të duhet të zbresësh”. Ka rëndësi të theksohet fakti që thoshte “të zbresësh”, dhe jo “të hidhesh”, siç vetë mendoja dhe ndjenja me dëshirë-frikë perverse në zemër. Kusuri i ëndrrës është tëpkë si në rastet e tjera më parë: hidhem në humnerë me pritshmërinë e fundit të tmerrshëm si domate e plasur mbi asfalt, dhe ndërkohë që bie, sa më teper bie, aq më tepër rënia shndërrohet gradualisht në zbritje, derisa prekja finale me tokën është përkundrazi një ngritje në mungesë gravitacioni, një lehtësi e papërballueshme e qënies, lumturia e përmbushjes të çfarë pa tjetër duhet bërë dhe lehtësisht bërë. Pra lumturia origjinale parazanafillore, urtësia hyjnore që rreziku nuk ekziston përveç si shpikje djallëzore; Rënia zanafillore që kemi brënda nesh - honi që njëkohësisht frikson dhe josh - krijon artificialisht rreziqe dhe vështirsi të paqena.
Durim se ka dhe më.
-Meqë je femër, dhe situatën e sheh nga jasht duke e kontrolluar më mirë se kush e pëson, si shpjegohet misteri i neutralitetit të figurës të gruas çfardo në ëndërr?
-S’ka asnjë mister, ky është informacioni më i vërtetë dhe më i bukur që përcjell kjo ëndërr, gruaja e ëndrrës simbolizon natyrën femrore të Zotit që thjeshtë këshillon, ngushëllon dhe lartëson pa qenë nevoja të joshë me bukurinë e madonave rinashimentale, dmth pa qenë nevoja për konflikt, pra koncepti origjinal femror i gruas, motrës dhe mikes. Stop, ndalu këtu, ja një vënd bosh për parkim. Ha ha, ndodhemi bash tek Piazza Beatrice, sa ja lu qeveria dhe femra poetit mor aman! Nxito se jemi vonë, takimi tani do ketë filluar.
Përplas bam bam portat e makinës, mbërthe kapotat duke e dridh nga era e ftohtë, hukat duart mbledhur grusht, me nxitim drejt sallës së takimit. Hyjmë në sallë, “njateta, njateta” të njohurve shpërndarë sa andej këndej, gjejmë vënd nga fundi. Nga avulli i kondensuar në xhamat e syzeve figura e një gruaje mbi katedër duket paksa turbull për të kuptuar se cila është. Mbas pak lentet kullohen dhe shoh se titulli i temës në ekran është Sollevazione, e ilustruar jo pa qëllim nga një video-këngë me titull pothuaj homonim. U ngashnjeva, sytë njomen, pamja turbullohet përsëri, por me siguri gruaja referente do jetë ajo e ëndrrës. Kjo është pak si tepër.
--------------------------------------------------
Postime: 5
Pjesëmarrësit: 3